كان ياماكان في قديم الزمان, كان فيه بنت بتحب تفوت مع أمها للمطبخ من شان تشوفها كيف تطبخ.
في كل مرة الأم كانت تطبخ السمكة الحارة بالصينية كانت تقطع ذيلها .. وفعلا السمكة تطلع كتير كتير طيبة.
كبرت البنت واتعلمت من أمها الطبخ, وكانت تعمل أطيب سمكة حارة متل أمها بالضبط.
ليوم إجت رفيقتها وكانت معها بالمطبخ, وشافتها وهي عم تحضر السمكة.. وشافتها لما قطعت ذيل السمكة ..
سألتها رفيقها: ليش قطعتي ذيل السمكة؟؟
قالتلها: مابعرف, بس أمي كانت تعمل هيك بالسمكة كل مرة.
ردت رفيقتها عليها وقالتلها: اتصلي على أمك وأسأليها ليش, حابة اعرف السبب؟
وفعلاً اتصلت البنت على ألأم وسألتها,,
وكان رد الأم: مابعرف والله , بس أمي كانت هيك تعمل بالسمكة ,وأعتقد أنها السبب لتكون طيبة كتير.
وهون البنت قالت للأم تتصل على الجدة.. وسألتها ليش كانت تقطع ذيل السمكة..
فكان رد الجدة: أنه وقتها ما كان فيه صينية كبيرة توسع السمكة فكانت تضطر تقطع ذيل السمكة لأنو الجد كان يحب رأس السمكة أكتر.برأيكم كام شغلة قلدنا أمنا وابونا بمعتقدات ومعلومات ومفاهيم واعتمدناها؟ ياترى كل شي اتعلمانه كان منيح كتير لنبقى نعلموا لوقتنا الحاضر؟
ياترى كام مرة اتعاملنا مع حدا وما كان الو ذنب بشي معنا بس لنو من غير جنسية ؟ أو يمكن فهمنا أنو مابيصير نعبر عن مشاعرنا حتى لو بلطف بس لأنة فهمنا أنو عيب؟ياترى مو صار لازم نعمل ابديت للموروث ونشوف اذا فيه أشياء لازم نغيرها فعلاً أو لا؟
